По месеци гласини и исчекување, долгоочекуваниот проект „Deeper“ официјално добива форма, во кој главните улоги ги играат Том Круз и Ана де Армас. Новата филмска соработка, под режија на Даг Лиман, се очекува да започне со снимање кон крајот на летото, нудејќи искуство кое ќе комбинира тензија, мистерија и импресивни подводни снимки.
„Deeper“ ќе биде третата соработка на Том Круз со Даг Лиман, по успешните „Edge of tomorrow“ и „American made“. Овој пат, двајцата повторно ги здружуваат силите за натприроден трилер, а приказната го следи поранешниот астронаут (Том Круз) кој презема истражувачка мисија до неистражен океански расцеп, каде што се соочува лице в лице со мистериозна и опасна сила.
Сценариото за „Deeper“ првично го напиша Макс Лендис во 2016 година, а сега е изменето и завршено од блискиот соработник на Том Круз, Кристофер Меквори, познат по својата работа на неодамнешните филмови „Невозможна мисија“.
Според извештајот на Deadline, буџетот на филмот е близу 200 милиони долари, што го прави еден од најскапите продукции на Том Круз. Пред да се одлучи за сегашната екипа и режисер, проектот беше поврзуван со големи имиња како Идрис Елба, Бредли Купер и Гал Гадот, додека Корнел Мудруцо беше разгледуван за режисерската улога во 2016 година, а Балтазар Кормакур во 2019 година.
Том Круз и Ана де Армас веќе започнаа интензивна обука за тешките подводни сцени во филмот, подготвувајќи ја основата за спектакуларно искуство.
Според информациите од World of Reel, се очекува „Deeper“ да биде следниот филм на Том Круз по „Невозможна мисија – Конечното пресметување“ и ќе биде објавен во кината во 2026 година. Всушност, тој ќе му претходи на долгоочекуваната неименувана комедија на Алехандро Гонзалез Ињариту, која е закажана за октомври истата година.
